400 гадоў першаму “Буквару”

12 снежня 2018 года ў музеі гісторыі народнай адукацыі Магілёўскай вобласці установы адукацыі “Магілёўскі дзяржаўны абласны інстытут развіцця адукацыі” адбылася сустрэча з намеснікам дырэктара па навуковай рабоце і выдавецкай дзейнасці Нацыянальнай бібліятэкі Беларусі Алесем Аляксандравічам Сушам.

Алесь Аляксандравіч прэзентаваў факсімільнае выданне першага ў свеце “Буквара”, які быў выдадзены 24 ліпеня 1618 года ў друкарні Віленскага праваслаўнага брацтва Святога Духа ў Еўі. Зараз існуе два вядомыя экзэмпляры 400-гадовага выдання, але ніводнага з іх няма ў Беларусі.

Адзін з “Буквароў” знаходзіцца зараз ў Каралеўскай бібліятэцы Даніі, другі – ў пачатку XVII стагоддзя быў вывезены брытанскім калекцыянерам у Лондан. На сённяшні дзень гэты асобнік “Буквара” захоўваецца ў Бібліятэцы Middle Temple (Вялікабрытанія).

У выніку міжнароднага праекта Нацыянальнай бібліятэкі Беларусі па ўзнаўленні “Буквара” выдадзены трохтомнік, які складаецца непасрэдна з факсімільнага выдання першага “Буквара”, а таксама яго пераклада на сучасную мову і вынікаў гісторыка-культурнага даследавання (другі і трэці тамы).

Паколькі праект стварэння факсімільнага выдання быў цалкам гуманітарным, яно будзе распаўсюджана па беларускіх бібліятэках, навучальных установах, а таксама – па галоўных бібліятэках замежных краін. Сваё месца “Буквар” знойдзе і ў экспазіцыі нашага музея.

Напрыканцы сустрэчы Алесь Аляксандравіч пакінуў дароўны надпіс на кнізе “Спірыдон Собаль і вытокі магілёўскага кнігадруку”, складальнікам якой і з’яўляецца.

Лусцянкова Дзіна Уладзіміраўна, загадчык музея гісторыі народнай адукацыі Магілёўскай вобласці УА “Магілёўскі дзяржаўны абласны інстытут развіцця адукацыі”, кантактная інфармацыя: тэл.: (0222) 40-03-71, e-mail: innov [at] mogileviro.by, innowazii [at] tut.by, skype: Музей

Смотреть ФОТОГАЛЕРЕЯ